最初我地都考慮天馬苑或者沙田第一城既樓,不過而家樓價咁高,連帶租樓都貴得緊要,平均都要6,7千蚊,我地負擔到,但根本慳唔到錢
,完全完成唔到我地既目標---儲錢買樓!所以幾經商量,又幾經睇樓,終於決定.....
o係慈雲山租套房住住先!套房即係將一個大單位間開幾間房,入面有咩獨立洗手間同廚房,不過就會好細一間,大約200呎到啦,雖然對我地黎講好似細左少少,就連sofa都放唔到,不過價錢就岩哂我地要求,都係幾千蚊,而且交通好方便,又近屋企喎!
由於屋企好細,所以要買既家具唔係好多,咁仲好啦,又慳番d喇!今晚我地同埋未來奶奶一齊再上去睇,因為星期日同左我媽咪去睇架喇,佢都幾鍾意,今晚未來奶奶睇左都話唔錯,話佢新裝修,起碼冇人住過先
,同埋都包左好多野,電磁爐啦,抽油煙機,床架,地櫃,熱水爐,所以我地真係買張床入去就訓得喇!
於是我地就落埋訂,3月2號就去簽約喇!我地一落完訂,就不停諗間"房"既設計,我地會以粉紅同藍做主色,唔要花巧,大概設計都有架喇,星期日就會去宜家行一行,睇下有咩慳位既家具先!
p.s.我地親愛既朋友,真係好sorry喇,因為新屋真係太細,可能暫時唔可以招呼你地住喇!遲d我地買左樓,一定請哂你地黎架!
